في وقت من الاوقات كنت إذا مشيت بالشارع احصل الناس تأشر علي ويقولون هذا عزوز ولد فلانه ،،، واكيد الكثيرين يقولون ليه هالناس مايقولون ولد فلان وانا بقول لكم السبب وهو لأن اللي يأشرون علي حريم حارتنا وحريم حارتنا يعرفون امي مايعرفون ابوي ،،، وكل مارحت الصباح للمدرسه او طلعت العب بالحاره او رحت للبقاله اشوف كل حرمه فاتحه باب بيتها وتأشر مع اني صغير وقتها بس السبب في انهم يطالعوني لأني كنت اشقر وعيوني خضر وبشرتي بيضا وحواجبي صفر ولهذا السبب كانوا حريم الحاره معجبات فيني وكل وحده تتمنى تجيب ولد يشبهني ،،، ولهذا السبب اصبحت اعاني للأسف ،، وكنت احمد ربي وانا صغير ان المدارس عندنا مهيب مختلطه والا وش يفكني من زميلات الدراسه
مع مرور السنين كبرت وصرت شين بس يبقى الجمال جمال الروح (( ايه هيّن )) ،،، بس استمريت ادرس حتى تخرجت من الجامعه ،،، وبعد تخرجي من الجامعه جتني عروض كثيره على وظايف وكل وظيفه احسن من الثانيه (( هذي اكبر كذبه بالموضوع ههههههههههههههههههههههه )) ولكني كنت احس اني غير وكنت ابي اسوي شي غير العالم ،،، يعني العالم تتخرج وتتوظف وتتزوج وتتقاعد وخلاص ،،، انا قلت لا ابي اتميز عنهم مثل ماكنت متميز عن بزران الحاره اول ،،، وكانت ميزتي عن بزران الحاره اني وسيم وكل حرم تجي لامي تبوسني اما عيال الحاره شهبان وكل واحد منهم إذا راحوا حريم لامه عطوه ريال وقالوا اطلع من البيت
لذلك قررت استمر على التميز واختلف عن العالم !!!!
عشان كذا قلت بسافر برا واشوف مستقبلي مضبوط ،، ابي اصنع شي او اخترع شي او يسجل اسمي في موسوعة جينيس للأرقام القياسيه بأي طريقه المهم ان العالم إذا شافتني يقولون هذا فلان وبالتالي اصير أشهر من القذافي هو وفروته (( لى الحين احسب اللي على القذاقي فروه )) .
واللي زاد مشكلتي مشكله ان اخوي ناوي يتعين أمين عام للأمم المتحده كم أسلف يعني بيصير هو راعي الأمم المتحده (( والله لو انها تسالي )) يعني لازم اكون افضل منه .
وفعلاً حجزت بسافر لأمريكا بزعمي ان الشي المميز مايطلع الا والواحد في امريكا .... واقلعت طائرتي (( كني شاريها )) بحفظ الله ورعايته الى نيويورك وكلي أمل ان احقق مالم يحقق غيري حتى قاقارين بنفسه !!!
وبعد رحله استمرت واجد من الساعات وصلت لأمريكا وضبطت وضعي وسكنت بشقه فيها اوربت وشوتايم (( ياشين اللي حده الثقبه )) ورتبت اموري وقلت من بكره ان شاء الله بشوف وش اسوي .
ويوم اني صحيت الصباح أخذت شهاداتي وعدتي وخصوصاً ان تخصصي مطلوب وقلت كل العالم بترحب فيني مهوب عندنا لو تجيب الدكتور بنفسه يزكيك قالوا اكيد يقرب لك ... ودخلت وحده من جامعاتهم وقلت لهم تخصصي كذا وكذا وفعلاً رحبوا فيني وماباقي الا يعرضون علي الجنسيه ،،، بس يوم اني فكرت حصلت ان وضعي مثلي مثل غيري وخصوصاً ان فيه طلاب كثيرين معي سعوديين يعني وين التميز اللي ابحث عنه ؟؟
أخذت ملفي الاخضر وشهاداتي ورحت لوكالة ناسا (( NASA للي ثقافتهم مثلي اجنبيه )) وقلت فرصه اكون اول سعودي يروح للفضاء وكنت ناوي افصل سلك قناتنا الرياضيه من جد فشلونا ... ولكني فكرت وقلت الأمير سلطان بن سلمان راح للفضاء قبلي يعني ماراح اكون اول سعودي ،،،، وفعلاً أخذت اوراقي ورحت لشركة مايكروسوفت قلت ابيهم يحطوني مشرف في الاقلاع (( على بالي بيل قيتس يدير النت كله هههههههههههههههههههههههههه )) بس يوم اني فكرت لقيت روبن سابقني في الاشراف وهذي لحالها مالها سنع حسيت ان الاشراف بعد روبن هو والكيرم مثل بعض ... أخذت ملفي مع ان بيل قيتس حلف علي وطلق اني اتغدا عنده قلت له يا رجال غداك لك عاد من سمعك قال اللي مملكك شيخ يعني حرمتك معك والا مهيب معك كله واحد ... وبعد ما درت كل شركات امريكا حصلت الشباب سابقيني في كل شي تقريباً
وانا راجع لشقتي اللي فيها اوربت وشوتايم مدنق الرأس كسيف البالك حصلت لوحه مكتوب عليها (( شركة جينيس للأرقام القياسيه .. لصاحبها جينيس وشركاه ليمتيد )) اما ليمتيد ذي مدري من وين طلعت ... المهم اني قلت اجرب حظي وفعلاً لقيتهم مداومين ودخلت عليهم ومن حسن حظي حصلت جينيس جالس بالمكتب حقه يتقهوا ،،، سلمت عليه وجلست اسولف معه وشرحت له حالتي وقلت له اني ابي اميز نفسي لذلك ابيك تحطني في كتابك .
قال جينيس / بس ياابوفيها (( بدا يمون ابن الكلب هههههههههههههههه )) الكتاب يبي له شغل جامد ،،،، يعني تسوي شي محد سواه قبلك .
قلت له / طيب انا اقدر اسوي اشياء كثيره وش قلت ؟؟
قال لي / وش تقدر تسوي ؟؟ عد علي وانا بعلمك كان فيه احد قبلك او لا !!
قلت له / صوتي حلو اقدر انزل شريط واكون افضل صوت في الدنيا .
قال / مالك فيها نصيب سبقوك فنانين كثار صوتهم احلى من صوتك .
قلت له / طيب مااعرف اغني العب عليك وانا اسوء مطرب بالدنيا
قال لي / مالك فيها حظ سبقك فيها جواد العلي
قلت له / طيب انا ناوي اشتغل واكون ثروه حتى بيل قيتس بدري عليها يصف جنبي وش قلت ؟؟
قال لي / مايصلح سبقوك شركة الاتصالات السعوديه
قلت له / طيب ناوي أشتري فريق كوره وبخليه افضل فريق كوره بالعالم !!
قال لي / للأسف سبقك بيرلسكوني راعي ميلان .
قلت له / طيب العكس بشتري لاعبين منتهية صلاحيتهم وبيكونون اسوء فريق بالعالم !!
قال لي / ههههههههههههههه طيب وفريق ابوخالد وين يروح (( احرجني ههههههههههههههههههههههه ))
قلت له / والحل يا جينيس ؟؟ يااخي لازم اتميز ؟؟ تبيني انحت صورتي على جبل ؟؟ تبيني اقلع بمنطاد وآخذ لفه حول عتيقه ؟؟ تبيني اسوق بالرياض شهر وماآخذ ولاقسيمه (( بدري عليك )) ؟؟ والا تبيني اكتب موضوع ماصل وأصير أمصل عضو بالدنيا ؟؟
قال لي / كل هالامور قد صارت وخصوصاً امصل عضو هذي (( الزاحف دوت كوم )) ،،، لكن انا بقلب بالكتاب واشوف لك شي محد سواه واتصل عليك واقول لك .
وفعلاً حطيت رقمي عند الرجال وأخذت رقم مكتبه وبيته ووصف بيته وان صلحت لي بنته اعرست عليها ويصير خالي جينيس
المهم اني جلست انتظر اتصاله ،،، ويوم انه طول علي دقيت على المكتب وسألتهم / جينيس موجود ؟؟ قالوا لي انه طالع يجيب حرمته صارت مدرسه بعد ...... وجلست على هالحال فتره كل مادقيت صرفوني قلت بس شكل الملعون مايبي يحطني في كتابه الظاهر حتى كتابه مافيه وظايف
جلست بشقتي اسبوع مابين اوربت وشوتايم مغير اتفرج على هالافلام حفظتها من كثر ماشفتها ،،، وفي ليلة ليست ككل الليالي رن التليفون وران صمت مطبق قبل ان ارد (( والله يا ران صمت مطبق ذي تصلح في الجاده )) ورديت الا هو جينيس وقلت له / وينك الله يرجك كل يوم ادق ماالقاك ،،، قال لي / يا رجال انشغلت وفي نفس الوقت جالس احوم ادور لك شي احطه بالكتاب واخيراً لقيت .... قلت له / زين زين الله يلعنك ،،، وش الشي اللي لقيته ؟؟
قال لي / انا يوم اني اجلس معك مثل ماانت عارف عرفت قصتك من الى وبصراحه ثبت لي انك حاله خاصه لذلك عطيتك لقب يحبه قلبك وان شاء الله بتقراه في الطبعه الجايه من الكتاب !!
قلت له وش هاللقب ؟؟
قال / انت اكثر شخص فيه الوان في العالم .... العيون خضر والشعر اشقر والبراطم مدري وشلونها ،،، يعني بالعربي انت تشكيله متنقله ..
قفلت السماعه بوجهه متضايقاً وربطت عفشي ورجعت لديرتي اشتغل في كباين اصرف لي ،،، وابي اقول لكم شي قبل انهي الموضوع واعتبروه نصيحه وخاصه للي بيروحون امريكا يدورون التميز ،، إذا رحت لأمريكا ومريت جينيس وكانت عيونك خضر وشعرك اشقر وكل الالوان فيك لا تقوله يحط في الكتاب على انك اكثر شخص ملون في العالم تدري ليه ؟؟
الإهداءات
عزوز يدخل ارقام جينيس باركو له هههههههههههه
