الا يا هاجس الذكرى تعال وغير المضمون=مدام الوقت ما يسمح يداوي من شقاه الحال
تعال و شوف بعيونك اذا باقي عليك ديون=حقوق(ن) تجبر الخاطر نمني في سماها الفال
تعبنا وكل ما فينا يعاني في حماه طعون=نقلب صفحة الماضي ويقلب همّها غربال
حكايه ببتدي فيها وابكشف سرّها المكنون=ابكتبها من الواقع و اغير بالرموز اشكال
حكاية طفلة(ن) حبت وهامت بالجنون جنون=تحسب ان الزمن مورد على كيف البشر ينهال
تمادت بالهوى وغنت على نبض الغلا بلحون=تبي تاقف على المشراف تشوف اللي بقلبه مال
تبّين حبّها بلحظه وتخاف الناس لا يدرون=تبي من هو خذاها بشوق تعيشه بالحنايا ظلال
تنادي يا سناء روحي يانبض(ن) بالخفوق يمون=تعال ارجوك نبنيها على قمة فضانا جبال
على شط الوفاء نبحر نداعب حلمنا الميمون=انا وياك لا ثالث سوى حب عليه آمال
ولبى الصوت مغناها وجاها بالحضور فنون=وسط قلبه يشيل هموم كثيره و الحمول ثقال
لفاها عاشق(ن) مغرم غرامه تنتشيه عيون=يحب و خاطره يصرخ كفايه يازمن ترحال
يبي جذع الغلا يكبر يحيطه بالهيام غصون=قفص في لونه الوردي مداد بالزمان أجيال
حلال(ن) حلّله ربي على سنة نبي الكون=شموخه يبتدي بساسه ثماره بالضجيج اطفال
ولكن آه من لكن نبت بأرض الغرام اشجون=تداعت كلها ضده وظبي الحب جاه جفال
ظروف(ن) قررت تاقف على حد الهوى بحزون=تفرق عشرة الاحباب وتقطع لشعور حبال
رمت حلم الصغيره بعيد من احلام(ن) بها المفتون=وقالت للحبيب ارحل ترى مالك بها منزال
سرى وموجه يهيج أحزان وقلبه يحترق مغبون=يبيها لكن الحيله ضعيفه والزمان أهوال
وصاحت طفلة الأشجان الا يادنيتي وشلون=تخوني لهفة آمالي وانا اللي به نخيلي طال
ترى كلك بلا حضوره بلا طعم وبليّا لون=فقيره والفقر كافر يباري في همومي جال
ولا ردت لها كلمة وخلت قلبها مطعون=يتوه بعالم أوجاعه وينهي قصته رحّال
غريبه كيف هالدنيا تخيّب في رجاها ظنون=وتقتل ساعة الفرحه على صوت الجحيم آجال
حكايه خطها حبري كتبت حروفها بالهون=من الواقع شذاها فاح ما بين الميم وحرف الدال
خفايا كوكب(ن) ثاني حزين وعالمه يشكون=ظلام الوقت والحسره وظيقة ما تجي بالبال
وانا في عالم الذكرى اذا باقي لها مضمون= مدام الوقت ما يسمح يداوي من شقاه الحال