ملاحظه /
الموضوع مكتوب وقت اجازة الصيف ،، يعني لحد يخش في عيني بسبب تضارب الاوقات
[line]
ها قد جاء الصيف وبدأت معه الأجواء الجميله خصوصاً عندنا بالرياض جميله جداً ،، انا وامي وابوي في اجتماع عائلي قد يطول وينتهي نهاية سعيده وقد يطول وينتهي نهايه مدري وش تبي ،،، الغرض من هالاجتماع اقناع الوالد حفظه الله بالسفر بالصيف هربهاً من حر الرياض الذي اصبح لا يطاق ،،، والوالد يقول انه مايبي يروح او يطلع من الرياض لأن السعوديين كل ديره يروحون لها يخربونها على حد قوله ،، ومن سمعه قال الرياض عاصمة النمسا ،،،، المهم وبعد مشاورات وجهود غير طبيعيه وافق الوالد بس بشرط ان احنا مانسافر لديره فيها عرب بالمره يعني بيروح بنا لديره مافيها عرب الا امي وابوي واخواني حتى انا منيب محسوب على العرب لأن كل من شافني يحسبني اسكتلندي ... وقلنا للوالد اجل خلاص بنفكر في الديره اللي بنروح لها وبنرد لك ،، وقبل نطلع من الغرفه وننهي الاجتماع رن تليفون البيت وكان واحد من اخوياي ورد عليه ابوي وناداني له وكلمته وواعدته اني بمره ،، وقبل اطلع قال لي ابوي بنظره كلها عطف وحنان / الحين وراك ما تسدد جوالك وتفكني من ازعاج اخوياك كل يوم داقين على البيت ؟؟ .. طالعته بنظره فيها من العطف والحنان اقل من نظرته بقليل وقلت له / جوالي مقطوع بـ 459 ريال ،،، كانك بتعطيني الحين 459 رحت اسدده وافككم من الازعاج ،، قال لي / اقول انقلع بس وانطم قبل تنقلع الحين تبون تسافرون وتسددون جوالات واللي لو اني قاعد على بنك (( عاد البنك ينقعد عليه ؟؟ ))،، وفعلاً سحبت نفسي وانقلعت غير مأسوفاً علي .
رحت للعيال وقلت لهم اننا بنسافر في الصيف وقعدت اواعدهم بهدايا وانا مامعي 459 اسدد جوالي ... وبعد ما كذبت عليهم شوي وقلت لهم اننا بنروح لجزر الانتيل عشان مافيها عرب رجعت لبيتنا عشان انام ملىء جفوني عن شواردها تخبرون بكره ورانا نقاشات تخص الرحله ولازم اكون بكامل قواي العقليه .
وفي الصباح الباكر ومع شقشقة العصافير استيقظت على صوت ابوي وهو يصارخ مثل العاده بس مدري وش يقول ،،،، خرجت من تختي (( مشكلة اللي خواله اشوام ينفضح غصب )) ورحت اشوف وش السالفه الا واحصل بيتنا كنه فسحه ،، مافيه بزر في العالم مهوب فيه ،، سالت امي وش هالبزران ؟؟ قالت هذولا عيال اعمامك جايين من برا الرياض بيجلسون عندنا الصيف يغيرون جو ،،،، قلت في نفسي وشو ثم اردفت سؤالي لنفسي بسؤال لامي / وش اللي يقعدون عندنا بالصيف ،، واصلاً احد يصيف بالرياض الا القطاوه ؟؟ ،، قالت لي امي / عاد ابوك يقول كذا والا تبيه يطرد اخوانه !! ،، بغيت اصيح بس اني قلت اتأكد اول كانهم بيقعدون الصيف كله وماراح يحصل لنا سفره صحت بدل ماتضيع الصيحه بالفاضي ،،، دخلت المجلس الا واحصل عماني وابوي وعيالهم اللي كنهم فسحه من كثرهم ،، سلمت وجلست وانا ساكت والشرر يطلع من عيوني وش جابهم يخربون علينا السفره ؟؟ .... وانا افكر في ايجاد حلول عشان اطردهم (( اسمع بالاخلاق ههههههههههههههههه )) التفت علي عمي الكبير وقال / وشلونك يارايح ،، ماشاء الله كبرت وصرت رجال ،، قلت له / اجل تحسبني مثلك للحين ؟ ،،، وهنا حدثت المعركه ولم يدرك والدي حفظه الله اني تكلمت في لحظة غضب ،، وطردني من المجلس وهو يطردني وانا اقول وبأعلى صوتي / تطردني من المجلس والفسحه تتركهم ،،، طيب على الاقل عطني 459 اسدد جوالي دام مافيه سفر ،،، قال انقلع بس لا جوال ولا سفر ،،، ولا تبي الصمان ماوديتك ياابن بطوطه من سمعك قال كل يوم في ديره ،، وانطردت بعد ان خربت الاخلاق وصرت فاضي من كل شي لا سفر ولا جوال ولا اخلاق .... وفي تلك الليله حدث مالم يكن في الحسبان ،، فقد أمرني والدي ان واحد من عيال عمي ينام بغرفتي لأن البيت زحمه وهم كثيرين ،، قلت له الا ماودك تزوجني وحده من بنات عمي وتنام بغرفتي وتخفف الزحمه ؟ ،،، ومارد علي مدري ليه حقرني ،، وفي نفس الليله نام في غرفتي واحد من عيال عمي وكان بثر وملقوف وكل شي يسأل عنه وليه هذا هنا وهذا هنا ،،، تضايقت منه اكثر من ضيقتي من جلستهم عندنا وانهم حرمونا من السفر ،،، ولكن وفي نفس الوقت خطرت لي فكره شيطانيه ونفذت فكرتي على طول ،،، مسكت ولد عمي اللي معي بالغرفه وربطته بحبل ومعلاق من المغسله كان في غرفتي من 3 سنين وكممت فاه (( اما فاه ،، احسها طالعه بالغلط )) وصورته بكاميرة فيديو وفي تلك اللحظه فقط كنت اقول الله يحلل برجس عندي ،،،
الإهداءات
عزوز ورحلة الرياض _ طوكيو _ أبها ذهاب وعوده الجزء الاول .......
العرض العادي
